بسم الله الرحمن الرحيم

ازى ترجع موبايلك اللى اتسرق و بتتصل بيه مغلق

تمام اوي سيبك من اي ابليكيشن ولاfind my deviceولا الهري ده كله كل ده هيتمسح لان اللي خده هيعمله ضبط مصنع علشان تجيب موبايلك ركز في الموضوع ده و ان شاء الله تليفونك هيرجع بنسبة95%

اتسرق مني هونر8ورجعته في شهر و نص ودي خلاصة تجربتي اولا متكلمش اي حد متعرفوش يرجعهولك علشان دول نصابين و عاوزين اي سبوبة و خلاص و هياخد منك نسبة وممكن اصلاً بعد ما يرجع يقولك للاسف مفيش و يكون خده هو، وكدة كدة مش هيعمل اكتر من اللي انت هتعمله انا رجعت الموبايل بدون ما ادفع مليم وبدون اي واسطة مش هتفيد في شي لان الموضوع روتيني جدا طالما دخل النيابة خلاص هيمشي زيه زي غيره
ثانياً متعملش محضر في القسم مباشرة الموضوع ببساطة هتتوجه لـمباحث التليفونات اللي حضرتك تابع ليها و بتعرف ده بانك تتصل بيهم و هما هيدلوك و ممكن تكلم الشرطة ا ١٤٠هيدلك على انهي مباحث تليفونات تتوجهلها و مواعيدها ايه انا في حالتي اتوجهت لمباحث شرق القاهرة فوق سنترال الماظة طلعت الدور الرابع لقيت مكتب قاعد فيه واحد و كان فيه طابور صغير٣اشخاص قدامي ضايع منهم تليفوناتهم ابتديت احس بالامان لما لقيت اللي قدامي بيقول دي تاني مرة موبايلي يتسرق و اجيبه لما جه الدورعليا الراجل طلب مني الاتي بطاقتي و صورة منها وعلبة التليفون الاصلية ومحتوياتها الاصلية اللي فاضلة معايا و صورة من العلبة من الناحية اللي فيها السيريال وارقام الشرائح اللي كانت في التليفون قبل ما يتسرق و هو اللي بيعملك المحضر بنفسه نيابة عن القسم وبتحتفظ برقم المحضر ده عندك مهم جدا اتاكد كويس من الارقام رقم رقم وارقام شرائح التليفون اللي كانت فيه علشان يتاكدوا انك انت صاحبه فعلا المهم تتعامل مع الموظف ده باحترام و توصيه باسلوب طيب ومحدش طلب مني اي بقشيش او فلوس نهائي رغم اني بصراحة عرضت عليه فلوس في ايده و رفض
بس كدة انت خلصت اول ما الموبايل هيتفتح ويتحط فيه شريحة تانية هيوصلهم اشارة برقم الشريحة اللي فيه و هما بنفسهم اللي هيكلمولك صاحبها علشان يخوفوه بالذوق و يقولوله التليفون ده متبلغ عنه و مطلوب فورا يا اما فيها حبس ومعاهم اسمه بالكامل و رقم بطاقته في اغلب الاحوال بشكل ودي جداً الي واخد الموبايل سواء هو السارق او حد غلبان اشتراه من الحرامي و ميعرفش في الحالتين بيجيبه فوراً مبيترددش و ساعتها هتلاقي امين شرطة بيكلمك تروح تستلم بعد حوالي شهرين لـ٣مثلا انت و حظك اما لو حضرتك حابب تتابع بتتوجه لقسم الشرطة تاخد منهم الرقم السري لرقم المحضر و بيدلوك تتابع مع انهي نيابة بتروح للنيابة دي تديهم الرقم يقولولك حالة الكشف ايه مثلا فودافون ردت رد سلبي اتصالات سلبي اورانج و وي لسة ، لحد ما حد فيهم يرد ايجابي

 ساعتها هتلاقيهم لوحدهم بيكلموك ويضبطوا معاك معاد ومكان تروح تستلم موبايلك بتروح وبتقابل الشخص اللي معاه التليفون في المكتب عند امين الشرطة في النيابة و بتعامله بادب و احترام اهم حاجة عندك تليفونك يرجع مش رايحين نتخانق ولا نشمت في حد جايز ميكونش هو اللي سرقه و يكون مظلوم زيك اشتراه من واحد نصاب ولو مش عاجبك حالته حقك ترخم عاللي شايل التليفون وتطلب تعويض عن استهلاكه بس انا 

حمدت ربنا بصراحة واكتفيت بالتليفون زي ما هو و بس بتمضي استلام و اغلاق محضر و بعد كدة الامين بياخدك انت و اللي كان معاه التليفون و يدخلكم لوكيل النيابة لتأكيد عملية الاستلام والوكيل ساعتها بيتاكد انك حقك رجعلك و بيحذر اللي كان معاه التليفون يشتري موبايل بدون علبه او مجهول المصدر الموبايل رجع الحمد لله وبدون مدفع ولا مليم ولا اي وسايط  متسيبش حقك ومتتعصبش ولاتستسلم و اعمل اللي عليك و ارضا بنصيبك في كل الاحوال و ان شاء الله خير
نصيحة مهمة بقي لما يرجع الموبايل ان شاء الله ما تنساش تعمله ضبط مصنع وانت واقف و تفتح جوجل اكاونت بحسابك لان لما عملتله ضبط طلع عيني علشان كان متسجل بحساب اللي كان شايله قبلي
واهم نصيحة انك متكسلش ومتستسلمش و اي حد تعرفه موبايله ضايع تشجعه يرجعه لان لو كل واحد فينا نفذ الاجراءات دي و رجع تليفونه هنقضي على فكرة سرقة التليفون نهائي واي حد هيفكر يسرق تليفون هيكون عارف انها ملهاش لازمة و هيسيبه مكانه
 ارقام مباحث التليفونات العامة
25771755/ 25798166
رقم مباحث تليفونات شرق القاهرة 22904224

عنوان مباحث تليفونات شرق القاهرة في مبنى سنترال الماظة الدور الرابع قدام كوبري النزهة

السلام عليكم ورحمه الله وبركاته